كيف يصنع الإخواني ؟! .. بقلم : د. رحاب القاضي

* الإخوان وكليات القمة ..

كل الناس ملاحظة طبعا إن ناس كتير من الإرهابيين خريجين كليات قمة زى الطب والهندسة مثلا والنقطة دى بالذات محور جدل بين الناس وتعجب .. ازاى حد في كلية زى دى ويبقى إرهابى ؟! .. ونفس النقطة دى برده بيتباهى بيها جدا الأخوان وكل فصيل الجماعات الإسلامية وبيقولوا جملتهم المشهورة ( إحنا كلنا دكاترة ومهندسين وناس قمة في الذكاء وبيفكروا أحسن من باقى الناس يعنى لما يشوفوا اننا صح يبقى انت مش هتفهم اكتر منهم ) ..

وبما إنى طبيبة وخريجة إحدى كليات القمة فحابة أوضح بعض أسباب ومراحل توغل الإخوان في كليات القمة :

أولا : مرحلة الإستقطاب

من أول يوم في الكلية وإحنا داخلين على الباب تلاقى بنات بتستقبل البنات وولاد بتستقبل الولاد .. أنا فكرت في الأول إن ده ترحيب من الجامعة نفسها بعد شوية كتييير فهمت إن دى أسر تابعة للإخوان .. المهم أخدونا البنات بمنتهى الأدب والكلام الجميل فرجونا على الكلية وفهمونا أماكن المدرجات وأماكن السكاشن وطبعا إحنا بنبقى تايهين فهم طوق نجاة لينا لأنهم مش بس بيفرجونا بس .. لأ دا بيقدموا خدمات فوق ما تتخيل كتب وملازم بأسعار بسيطة الهيكل العظمى بيتأجر بأسعار رمزية او ببلاش أحيانا شرح للمواد مجانى فشئ فطبيعى بنمسك فيهم لأننا بنكون محتاسيين وخصوصا اللى زيي خارجة من مدرسة حكومية ومعنديش حد في أسرتى دكتور يساعدنى حتى بالنصيحة والمرحلة دى مهمة لأنه بيبدأ يحببك فيهم وطريقتهم ومعاملتهم الحسنة ومساعداتهم ..

ثانيا : مرحلة التمهيد للإنتخابات

المرحلة دى طبعا بعد ما كلنا شوفنا قد ايه هم ناس كويسة فيبدأوا ينزلوا انتخابات إتحاد الطلبة وكنا طبعا كلنا بننتخبهم لأنهم فعلا كويسين وبيخدموا الطلبة لكن كانت الجامعة بتسقطهم واحنا كنا نستغرب اوى ونقول ده ظلم حرام ومع سقوطهم كان بيزداد تعاطفنا معاهم ويزداد شعبيتهم وكمان يزداد غضبنا من الجامعة اللى هم كانوا وقتها بيحاولوا يصوروها على إنها الدولة ..

ثالثا : مرحلة فلسطين وزرع الثورة جواك

ودى كانت بالكلام المستمر عن تحرير فلسطين ووقفات إحتجاجية ليهم كل ميحصل حاجة في فلسطين زى قتل محمد الدرة مثلا وزرع جواك رفض لموقف الدولة وضعفها وكلام يقطع القلب عن الجهاد لتحرير الأقصى .. فهو هنا دخل لينا فكرة الجهاد بصورة مغلفة ومحبوبة وربط فكرة الجهاد بقضية فلسطين المحتلة وزرع جواك غضب وتعاطف وغيرة عالدين وحث على الجهاد وطبعا كانت برده الجامعة بتفض المسيرات دى فيزداد سخط الطلبة على الجامعة واننا مكبوتين وليه الدولة مش عوزانا ناخد حق فلسطين ..

رابعا : مرحلة الدعوة للفكر الإخوانى

طبعا هو خلاص هيأك إنك تسلمه دماغك فيبدأ بقى بعمل ندوات دينية وجلسات حفظ للقرآن وكلام عن الحجاب والتبرج والزى الإسلامى وعدم الإختلاط وعدم تقبل العقائد الأخرى وعدم تقبل الفكرالآخر لدرجة انهم كانوا بيشتموا في السلفيين .. ويبدأ يغيرلك مفردات كلامك زى مثلا متقولش والنبى قول بالله عليك .. متقولش ألو قول السلام عليكم .. متقولش شكرا قول جزاك الله خيرا .. وطبعا مع دس فكر تكفير الدولة ويحكوا عن فلان طالب معانا معتقل وأمن الدولة عذب أمه وأخواته وفلان زميلنا إتحبس ليلة إمتحانه عشان يسقط وفلان زميلنا الجامعة جابتلوا بلطجية ضربوه في المسجد وفلان وفلان ويبدأ يفصلك عن الدولة ويدخلك العالم بتاعهم بدون ما تحس وانت بتسمع وبيتسرق منك عقلك بدون ما تشعر ..

خامسا : مرحلة التكافل الإجتماعى

المرحلة دى بيبدأ يقربك منهم أكتر .. يعنى مثلا يقولك احنا بنجمع فلوس لأسرة واحد مظلوم في المعتقل أو بنساعد الطلبة الغير مقتدرة أو عزاء أحد من الأخوة أو فرح إسلامى لأحدى الأخوات أو رحلة إسلامية يعنى الولاد لوحدهم والبنات لوحدهم أو عمل خيرى إسلامى ويبدأ يربطلك كل حاجة بكلمة إسلامى عشان يضفى عليها صفة القبول والطاعة ..

سادسا : مرحلة تكفير الدولة

والمرحلة دى بيشحنك ضد الدولة بكل مؤساستها ويبدأ يقنعك إن مفيش حاجة اسمها دولة .. دى حدود إحنا اللى حطناها على الخريطة لكن الحقيقة إن الولاء بيكون للدين بس مفيش حاجة اسمها ولاء للدولة .. يعنى المسلم الأفغانستانى أقربلك من جارك المسيحى .. ويحسسك إن كل ما فى الدولة حرام وفلوسها حرام وانهم مضطهدين وإن اللى في المعتقلات مظلومين وانهم أبطال وإن الدولة برئيسها بضباطها بجيشها كفرة ..

سابعا : مرحلة حلم الخلافة الإسلامية

طبعا انت اصلا خلاص بتحلم بكل ما هو إسلامى .. وبما إن مفيش دولة في عرفك والقوانين وضعها الإستعمار الفرنسى الكافر يبقى طبيعى ها يأكدلك إن تطبيق دين الله وإقامة الخلافة الإسلامية حق وهدف والجهاد من أجل الهدف ده شهادة وأمنية .. وإن مهما كانت الطرق مليانة بالدم لكن الهدف سامى وهو إقامة خلافة تعلو فيها كلمة الله أكبر ويطبق فيها الحدود وشرع الله ولو استشهدت وإنت بتجاهد الكفار فإنت شهيد ينتظرك الجنة وحور العين ومحبة ورضا رب العالمين ..

ده شرح مبسط للى بيحصل في كليات القمة واللى شوفته أنا بنفسى .. لكن لأنى شخصية صعب قيادتها اتمردت على الفكرة من بدايتها ولكن اعرف اصدقاء وزمايل مروا تقريبا بكل المراحل دى وكنت بتابع التغيرات اللى بتحصلهم اللى أنا قولته ده ان الإخوان مبتطلعش دكاترة ومهندسين لأ .. همه أصلا بيشتغلوا على طلبة طب وهندسة كويس جدا وبيستغلوا ان طالب الكليات دى اصلا مبيعملش حاجة .. فحياته تقريبا ما فيهاش غير إنه يذاكر ويصلى وسهل إنك تلعب عنده على الناحية الدينية دى لأنها أصلا موجودة ..

المراحل اللى انا قولتها دى أسست الجيل الأول والثانى للإخوان المسلمين .. وطبعا الأخ اللى في الجماعة والأخت اللى في الجماعة إتجوزوا بعض وخلفوا الجيل الثالث من الإخوان شاربيين الجهاد بقى من صغرهم متربيبن تربية مختلفة ومش محتاجين اصلا كل المراحل دى .. وده يفسرلنا صغر سن التسع إرهابيين اللى اتعدموا .. لحقوا امتى يبقوا إرهابيين ؟! .. دول لما تسمع كلام أهاليهم هتفهم المعنى اللى أقصده بالضبط .. حتى أبو واحد فيهم لما قرأ وصية إبنه في قناة مكملين قال في نص الوصية ( متزعلش يا أبى ويا أمى أنا أخترت طريق الجهاد اللى انتوا ياما إتمنيتوا تشوفونى فيه ) .. وده بيأكد كلامى إن الأسرة أصلا إخوانية والولد طرح طبيعى لفكر أهله .. طبعا مش بتهم أهاليهم كلهم بده أكيد مش كل أسر الإرهابيين إخوان .. لكن الغالبية منهم فعلا إخوان متطرفين وطبعا عوامل كتير ساعدت بقى فوصول الشاب ده إنه يبقى إرهابى بس انا بتكلم في نقطة محددة ..

النقط اللى ذكرتها محتاجة إلتفات من الدولة للطلبة ولإتحاد الطلاب وللنقابات لأن هم بقوا زى السوس جوه عضم الدولة .. وعلى فكرة مش اى واحد بيمر بكل المراحل دى .. يعنى فيه إخوانى كيوت واقف عند المرحلة الرابعة مثلا وإخوانى متشدد وقف عند المرحلة الخامسة وإخوانى متطرف وقف عند المرحلة السادسة وإخوانى إرهابى وصل للمرحلة السابعة .. وده برده يفسر ليه فيه إخوان شايفين نفسهم كيوت ومستحيل يؤذوا أحد وده لأنهم اصلا متخطوش المراحل الأولى في تجهيزهم وفاكرين الإخوان كلهم واقفين عند نفس المرحلة طبعا لأ .. لأن الموضوع بيختلف على حسب إستجابة كل شخص للفكرة وطريقة تفكيره ومدى ثبات نفسيته ومدى قوة التأثيرعليه والعامل التربوى والأسرى اكيد برده ليه عامل ..

البوست ده لتوضيح بس إن الأذكياء مش عشان بيفكروا كويس بيختاروا انهم يبقوا إخوان .. لأن حضرتك اللى بتصطاد طلبة طب وهندسة وصيدلة وتشتغل عليهم كويس جدا عشان تصدر للناس الفكرة دى وتتوغل في نقاباتهم عشان تأكد نفس الفكرة ..
مفيش إنسان زكى هيختارك مفيش أصلا إنسان سوى هيختارك إنت مش إختيار إنت لعنة أصابت كتير من شبابنا للأسف ..

اللهم أرنا الحق حقا وأرزقنا إتباعه وأرنا الباطل باطلا وأرزقنا إجتنابه ..

أ.د / رحاب القاضى