ما تبقي لوشي رئيسة السودان ؟ .. بقلم حاتم محمد

( رئيس الوزراء السوداني يهدد حسناء الإعلام “لوشي”.!) لقيت الخبر الطاشي ده لافي ,,, اتصدر قائمة الأكثر قراءة ,, قلت خير (معتز) اكيد كان قاصد بالصدمة ,, ان ح يهاجم رئيستنا الفلته الجاية لوشي ,,, حقيقة بعد ما استغربت ,, رجعت تاني واتأملت الخبر ,, عاينت شديد واتأملت ,,, قلت يا ربي معتز ده مالو هسه ؟؟؟

ولما قرينا التحفة … قالوا المشكلة انو ,, تغريدات رئيس الوزراء ,, بقت بتلاقي متابعين اكثر من رئستنا الجاية لوشي ,, وهذا من ما يهدد عرش الحسناء الإعلامية ,,, تخيل ,, ان الشعب اللوشاوي ح يبقى بعد شوية مشغول بمتابعة المعتزاوي !!!
انا ذاتي مستغرب مالي ,, ما عارف
ليه الدستور ما نعدلوا عشان لوشي ,,, بدل الناس التانيين ,,,
ما عليكم الله فكرة ,, بدل ما نقعد نتجارا بين باريس والخرطوم واديس ابابا …
أنا ذاتي مستغرب مالي ؟
ما اه الطيب مصطفي مالو ,, فصل الجنوب وبيرطع ,,, وبكتب انو ح يطلع سلاحو – عادي ,, ما هو خال الرئيس المعارض ,,,
بس قولي لي ,, لوشي ما له , ما احسن ,, لهشت ولانشت ,, عايش كويس ,, ومتجدعه ,,, ما نحن شعب لوشي ,و ماشاء الله علينا ,, مرتاحين ,,, وعاجبانا ,, قطة لوشي ,, وبنطلون منى ,,, واي حاجة فارغة تاني ؟؟
انا ذاتي مستغرب ما لي ,,,
اه الصادق المهدي ,, ما شاء الله – حال السرور عليهو – ,, رِجل في المعارضة ,,, واحده جو القصر ,,,
انا مستغرب مالي
ما نحن اصلاً شعب فارغ
مشكلتنا بقت بنطلون منى ,, وحملات صدر لوشي
ورقصة بشة الأخيرة في الميدان ,, نهايات شكلة حميدتي واحمد هارون
لم نزهج ,, يقوم الصادق ,, يعمل حركة كده ,, يعلن تأجيل عودة الامام …
نحمدلله ,, رئيستنا لوشي ,,, قاعدة جوه السودان ,,وما عندها مشكلة ,,, ب طرف طفر صباعه الصغير ,, تجهجه حكومة الالمان
ما نحن شعب لوشي المقدام ,,, المشكلة وين ؟
أحزابنا التقدمية ,, مبنيه على أسماء معينة ,, منذ قديم الزمان ,,, فلان وعلان وفرتكان ,, لان هؤلاء السادة الكرام ,, هم اهل العزم والحزم ,, وبث الكلام ..
ما نحن بالجد شعب فارغ ,,
معايروا مقلوبة ,,, لبسه اوربية انيقة , موبايل امريكي فاخر , ولسان طويل ,,, خلاص
وللمفارقة ,, حتى الجلابية ,, بقت تركية وهندية ,, انا مستغرب مالي
وفي برنامج لوشي الجاي ,, خلي بالك ,, يا حبيب ,,,عشان تقدر تعرض حاجاتك لجمهور ,,, لازم تكون اصفراني ( لو بالكريمات ) وشعرك سبيبي( لو تركيبة ) ,,, بطريقة ح نغيير كل رموز المعارضة والحكومة ,,, من غير شيل سلاح ولا تغيير دستور تاني ؟؟؟ عليكم الله ما جدعة …؟
لكن طبعا رئيستنا حريصة على الاقتصاد ,,, وعملت استثناء صغير , لناس العندهم قروش بالتحديد ,, وفي بعض الأحيان ,,وقالت ( لازم تكون من الاسر الله الراضي عنها )
وعشان الناس تسمع كلامك ,, لازم تصاحب ناس الاعلام وتشرب قهوة جم ستات الشاي ,,, وتكون ذي ما الناس عايزة , ظريف ,,, ودي يعني شنو صدقوني , ما عارف ؟
لكن معنى ظريف دي , لابد ان يحتوي على عدد أشياء ,, لا اواجه الناس ,, اقطع في داك ,,, وأسفه البشر
ممكن برضو نضيف للتعريف السابق ,, انبز في الحكومة والمعارضة ,, ما ياهم ديل ناس : (خالد أبو رهف وعلى هباني والبوشي … الخ ) ,, لسانهم فالت ,,, كوراك وشتيمة ,,,والأمور ماشه ونجوم
ليه ما تبقى لوشي رئيستنا ,,و على الأقل بتقدر تحنك العندهم قروش ,, وبدل ما تبيع مشروع الجزيرة ,, تقلب ليها كم قلبه في السوق ,, تجيك الأوراق المسينها قروش مكبوبة في السودان ..
ما نحن شعب فارغ بالجد ,,,
مما يلدوك , وتبدأ تتعلم الكلام يعلموك تسفيه الآخر : ( قول ليهو ياشين , ياكلب ) ,,
تكبر شوية ,,, يورثوك آلية التناقض ,,, : ( لو كان فلان في الباب ,, قول ليهو ابوي ما في )
من ما تتعلم الادراك,,, يعلموك كرم الضيوف ,, على حساب ناس البيت ..
بس قولو لي : ح ينصلح حالنا كيف ؟
نقيف ضد تركيا وامريكا ,, ونشجع في السعودية ما لو ,, بالمناسبة السعودية , كان جا منها خطيب ل لوشي قال ح يدفع 25 مليون دولار
يعني رئيستنا قبل ما تترشح ,, جابت لينا القروش ,,, عليكم الله ما أحسن ,,, من ما نقتل أولادنا في اليمن عشان كم مليون بس !!! شايفين لوشي كيف ؟
ما نحن بالجد شعب فارغ ,, كتمت ,,, كتمت ,,, قلبت ,, قلبت ,,, اعرض يا بشه ,,
خليك كده يا شعب لوشي …
تعيش لوشي ,,, وقطة لوشي ,,, تحيا الوحدة اللوشاوية ,,, من اجل سودان بكرامة وحرية ,,,,
وتسقط الرقصة الرئاسية ,,, وتحيا الوحدة اللوشية ,,
ما نحن بالجد شعب فارغ ,,, وما بنجرى الا ورا البترجعنا لي ورا